Haukur Guðlaugsson, fyrrverandi söngmálastjóri þjóðkirkjunnar heldur kynningu í tilefni af útkomu þriðja heftis orgelskóla síns sem er jafnframt lokaheftið.
Kynningin fer fram í Hallgrímskirkju fimmtudaginn 9. október kl. 18. Auk fyrirlesturs Hauks verður leikið á Klais-orgelið verkefni úr orgelskólanum.
Haukur byggir orgelskóla sinn að hluta til á pedaltækni ítalska orgelsnillingsins og kennarans Fernando Germani.
Hauk þarf vart að kynna en hann starfaði sem söngmálastjóri þjóðkirkjunnar í áratugi. Hann starfaði einnig sem organisti við Akraneskirkju frá 1960-82. Auk þess var hann ástríðufullur kennari og er mikill brunnur í kennslufræði og tækni orgeltónlistarinnar.
Nemendur Tónskólans fá sem fyrr kennslubókina á afsláttarkjörum.

Hér er komið skóladagatal fyrir veturinn 2008-2009

Tónskóli Þjóðkirkjunnar verður settur í Grensáskirkju föstudaginn 5. september kl. 17. Kennsla hefst svo mánudaginn 8. september samkvæmt stundaskrá.

Tónskólinn tekur þátt í organistanámskeiði Söngmálastjóra Þjóðkirkjunnar í Skálholti dagana 18.-20. ágúst með námskeiði Mattiasar Wager í litúrgískum orgelleik. 6 nemendur verða virkir en námskeiðið er öllum opið.
Kennsla í litúrgískum orgelleik leggur áherslu á guðsþjónustuna, orgelundirleik við almennan safnaðarsöng, gerð stuttra forspila og frjálsan spuna. Valdir verða þekktir sálmar sem falla vel til almenns söngs, svo og nýir sálmar. Kennslan skiptist í hóptíma þar sem sýndir verða ótal möguleikar á útfærslu sálmaundirleiks og sálmaforspila, og einstaklingskennslu, þar sem virkir þátttakendur fá einkatíma. Kennslan fer fram við Frobeniusarorgel Skálholtskirkju.

Leiðbeinandi er Mattias Wager organisti dómkirkjunnar í Stokkhólmi.

Skrifstofa Tónskólans verður lokuð í júlí vegna sumarleyfa starfsfólks. Skrifstofna opnar aftur þriðjudaginn 5. ágúst.

Skólaslit Tónskólans fóru fram í Hallgrímskirkju föstudaginn 23. maí s.l. Afrakstur vetrarins er ríkulegur þar sem 12 nemendur luku áfanga frá Tónskólanum í vor. Þar af eru 5 nemendur sem luku Kantorsprófi og er það í fyrsta skipti í sögu skólans svo margir ljúka þeim áfanga samtímis. Það voru þau Arnór Vilbergsson, Bjartur Logi Guðnason, Julian Edward Isaacs, Sólveig Sigríður Einarsdóttir og Tómas Guðni Eggertsson. Kirkjuorganistaprófi luku Aðalheiður Þorsteinsdóttir, Eyþór Franzson Wechner, Hákon Leifsson, Helga Þórdís Guðmundsdóttir, Tryggvi Hermannsson og Örn Magnússon. Ágúst Ingi Ágústsson lauk einleiksáfanga.
Er þeim öllum óskað til hamingju með áfangann og bjartrar framtíðar á akri kirkjutónlistarinnar.

Skólaslit Tónskóla Þjóðkirkjunnar verða í Hallgrímskirkju föstudaginn 23. maí kl. 18. Á skólaslitunum koma fram þeir nemendur sem ljúka Kantorsprófi nú í vor. Það eru þau Arnór Vilbergsson, Bjartur Logi Guðnason, Julian Edward Isaacs, Sólveig Sigríður Einarsdóttir og Tómas Guðni Eggertsson.

Vortónleikar Tónskóla Þjóðkirkjunnar verða í Hallgrímskirkju laugardaginn 17. maí kl. 17. þar koma fram nemendur skólans í orgelleik. Flutt verða verk eftir m.a. Bach, Buxtehude, Böhm, Mendelssohn og Reger.

Spunameistarinn Hannfried Lucke heldur námskeið fyrir nemendur Tónskólans í litúrgískum orgelleik II og III í Hallgrímskirkju dagana 14. apríl frá 13-16 og 15. apríl frá 10-12 og 13-15. Námskeiðið er opið áheyrendum og allir velkomnir. Hann kemur jafnframt fram á tónleikum Listvinafélags Hallgrímskirkju undir yfirskriftinni „Töfrar orgelsins“ laugardaginn 12. apríl kl. 14 og í Grindavíkurkirkju sunnudagskvöldið 13. apríl kl. 20. Þar mun hann leika verk meistara orgeltónbókmenntanna auk þess sem hann mun leika af fingrum fram um gefin stef.

Lesa áfram

Ágúst Ingi Ágústsson hélt burtfarartónleika frá Tónskólanum, en tónleikarnir fóru fram í Hallgrímskirkju laugardaginn 22. mars. Voru tónleikarnir liður í einleiksáfangaprófi hans. Óhætt er að fullyrða að efnisskrá Ágústar Inga hafi verið sú viðamesta sem nokkur nemandi frá skólanum hefur leikið á lokatónleikum fram að þessu. Á myndinni má sjá Ágúst Inga ásamt kennara sínum Herði Áskelssyni og Birni Steinar Sólbergssyni skólastjóra.