Skólaslit Tónskólans fóru fram í Hallgrímskirkju föstudaginn 18. maí. Átta nemendur luku áfanga frá skólanum nú í vor. Það eru þau Ásta Haraldsdóttir, Jaan ‎ Alavere, Jón H. Geirfinnsson, Kaldo Kiis, Kjartan Eggertsson, Matthías V. Baldursson og Örlygur Atli Guðmundsson sem ljúka kirkjuorganistaprófi.
Jóhann Bjarnason lauk kantorsprófi.
Á myndinni má sjá útskriftarnemana ásamt Birni Steinari Sólbergssyni, skólastjóra og sr. Jóni Helga Þórarinssyni formanni skólanefndar Tónskólans.

Skólaslit Tónskólans verða í Hallgrímskirkju föstudaginn 18. maí kl. 17. Átta nemendur ljúka áfanga frá skólanum nú í vor. Það eru þau Ásta Haraldsdóttir, Jaan ‎ Alavere, Jón H. Geirfinnsson, Kaldo Kiis, Kjartan Eggertsson, Matthías V. Baldursson og Örlygur Atli Guðmundsson sem ljúka kirkjuorganistaprófi.
Jóhann Bjarnason lýkur kantorsprófi.

Í tengslum við framhaldspróf Jóhanns Bjarnasonar verða tónleikar í Akureyrarkirkju mánudaginn 14. maí kl. 18. Þar flytur Jóhann orgelverk eftir Jan Pieterszoon Sweelinck, Johann Sebastian Bach, Richard Schumann og Louis Vierne.

Vortónleikar Tónskóla Þjóðkirkjunnar verða í Langholtskirkju sunnudaginn 13. maí kl. 17. Á tónleikunum flytja nemendur skólans í orgelleik orgelverk frá ýmsum tímum.

Hér er hægt að sækja um skólavist í Tónskóla Þjóðkirkjunnar fyrir skólaárið 2012-2012 og senda á tonskoli@tonskoli.is. Umsóknarfresturinn er til 15. maí.

Inntökuskilyrði
Inntökuskilyrði fyrir Kirkjuorganistapróf er miðstig í píanói auk viðtals við skólastjóra.
Inntökupróf er fyrir nám í Kantorsnámi.
Inntökupróf er fyrir nám til BA-gráðu. Sjá nánar á www.lhi.is
Inntökupróf er fyrir nám í einleiksáfanga.

Til að sækja um kórstjórn sem aðalfag þarf viðkomandi að jafnaði að hafa nokkra undirstöðu og einhverja reynslu.

Tónskóli Þjóðkirkjunnar fagnar 70 ára starfsafmæli með hátíðarsamkomu og messu í Hallgrímskirkju sunnudaginn 15. apríl kl. 17.

Á hátíðarsamkomunni flytur Kristinn Örn Kristinsson, fyrrverandi skólastjóri Tónskólans erindi þar sem hann fer yfir sögu skólans í máli og myndum.
Hr. Karl Sigurbjörnsson, biskup Íslands flytur ávarp og orgelkennarar skólans leika á Klais-orgel Hallgrímskirkju.

Kl. 18 verður messa þar sem Róberts A. Ottóssonar, fyrrverandi söngmálastjóra Þjóðkirkjunnar verður minnst, en í ár eru liðin 100 ár frá fæðingu hans. Sr. Kristján Valur Ingólfsson, vígslubiskup í Skálholti messar en nemendur Tónskólans annast tónlistarflutning undir handleiðslu kennara skólans.

Tónskóli þjóðkirkjunnar býður til aftansöngs að hætti ensku kirkjunnar í Hallgrímskirkju sunnudaginn 26. febrúar n.k. klukkan 17.00. Nemendur í kórstjórn flytja og stjórna aftansöng, sem margir þekkja undir enska nafninu “Evensong” og tíðkast hefur við margar kirkjur í Bretlandi síðan á 16. öld. Alls koma fram 10 stjórnendur, sem stunda nám í kórstjórn hjá Herði Áskelssyni. Fluttir verða ýmsir kórsöngvar, Lofsöngvar Maríu og Símeons og Davíðssálmar með og án orgelundirleiks. Orgelleikari er Guðný Einarsdóttir og prestur sr. Birgir Ásgeirsson prófastur.

Jólafrí nemenda og starfsfólks Tónskólans verður frá og með mánudeginum 12. desember. Kennsla hefst aftur mánudaginn 9. janúar 2012. 

Starfsfólk Tónskólans óskar öllum gleðilegra jóla og farsældar á komandi ári!

Jólatónleikar Tónskóla Þjóðkirkjunnar verða haldnir í Langholtskirkju föstudaginn 9. desember kl. 17.
 Þar koma fram nemendur Tónskólans í orgelleik og kórstjórn.
Á tónleikunum verða flutt verk tengd aðventu og jólum.

Tónskóli Þjóðkirkjunnar verður settur í Grensáskirkju föstudaginn 9. september kl. 17. Kennsla hefst svo mánudaginn 12. september samkvæmt stundaskrá.